Quedan-se a la Palabra de l Senhor

Hai eiqui giente de paç ou de guerra?
Preguntou l cabaleiro benido de la nuite.
Pan i binho, aquemodai-me an sou linho
ls perros de la muorte speran ne ls caminos.
Scutai, este ye un pouquito de bida
chigai-bos, sentai-bos
binho para toda la giente,
eilhes stan mudos cumo nua eigreija
quedan-se a la palabra de l senhor.
Senhores desta tierra,
curto ye l camino até casa, Miranda de l Douro,
pur montes i balhes
las streilhas de l cielo nu fáien lhuç
nien para mius olhos queimados pul sol
nien sequiera para ls olhos de l Senhor.
Ls anhos passarún, you era nuobo,
stou mais muorto que bibo, la tierra me spera,
l tiempo passa pulas nuossas bidas
tantos anhos zde que parti para la Tierra Santa
pula fortuna, pula glória, pula lienda,
pula tierra adonde Maria fue mai.
Nuossas armas nu adrumecian nuite i die
toda la mourarie era un semiterio
al chigar la lhuna cuntaban-se ls muortos
mouros i cristianos anterraban sous armanos
cada un a sou cielo, a sou dius.
Yá solo drumimos quando las fuontes nos deran auga,
berdes alboredos na rue para l'eigreija,
nuossas ninas
an frolidos campanos, trigo i centeno
nu hai nada cumo nuosso teilhado.